अन्तर्राष्ट्रिय युवा दिवसको अबसरमा शिक्षाका लागि राष्ट्रिय अभियान नेपाल (एनसिई नेपाल),जिल्ला समन्व्य समिति उदयपुरको आयोजना तथा सूचनाको हकका लागि राष्ट्रिय संजाल नेपाल, जिल्ला संजाल, उदयपुर शिक्षा सरोकार मञ्च, उदयपुरको समन्वयमा खाद्य प्रणालीमा रुपान्तरण मानव र भुमण्डलिय स्वास्थ्यका लागि युवा नवप्रवर्तन’ भन्ने मुल नाराका साथ “सार्वजनिक सूचनामा युवाको पहुँच र शिक्षा विकासमा युवा सहभागिता” बिषयक एक दिने अन्तरक्रिया कार्यक्रम भर्चुअल माध्यमबाट सम्पन्न भएको छ ।
युवाहरुको मुद्दालाई स्थापित गर्न संयुक्त राष्ट्र संघले सन् १९९९ देखी हरेक वर्षको अगष्ट १२ लाई अन्तर्राष्ट्रिय युवा दिवसको रुपमा मनाउने निणर्य गरे अनुसार सन् २००० अगष्ट १२ देखि प्रत्येक वर्ष दिवस मनाईंदै आईरहेको छ ।
शिक्षाका लागि राष्ट्रिय अभियान नेपाल,जिल्ला समन्व्य समिति उदयपुरका अध्यक्ष पुष्पराज पोखरेलले अध्यक्षता सचिव अजय कुमार शाहले संचालन गर्नुभएको उक्त कार्यक्रममा उदयपुरका युवा संजालका प्रतिनिधिहरु, युवा अभियन्ताहरु, स्थानिय किशोरकिशोरी अभियन्ताहरु, एनसीईका जिल्ला सदस्य संस्थाका प्रतिनिधि, शिक्षा क्षेत्रमा कार्यगर्ने गैरसरकारी एवं नागरिक समाज सम्बद्ध संघ संस्थाका प्रतिनिधि, स्थानिय महिला जनप्रतिनिधिहरु, स्थानिय स्तरमा रहेका नमुना विद्यालयका प्रतिनिधिहरु, स्थानिय जनप्रतिनिधिहरु, शिक्षा अभियन्ताहरु, स्थानीय संचारकर्मी एवं पत्रकार सहित ४० को सहभागीता रहेको थियो ।
उक्त कार्यक्रममा शिक्षा विकासमा युवाको सहभागिता भन्ने बिषयमा शिक्षा सरोकार मञ्च, उदयपुरका अध्यक्ष जस बहादुर कार्कीले कार्यपत्र प्रस्तुत गर्नु भयो भने सार्बजनिक सूचनामा युवाको पहुच भन्ने बिषयमा बिषय विज्ञ धर्मेन्द्र झाले कार्यपत्र प्रस्तुत गर्नु भएको थियो ।
