निश्छल कार्की
कटारी, १७ बैशाख
कटारी नगरपालिकामा ‘मास्क लगाऔँ, आफू बचौँ र अरुलाई पनि बचाऔँ’ भन्दै सचेतना स्वरुप मास्क वितरण सुरु भएको छ ।
इलाका प्रहरी कार्यालय कटारी र नगर प्रहरीको सहयोगमा नगरपालिकाका उप प्रमुख भिम कुमारी राउत नेतृत्वमा यो अभियान सुरु गरेको हो । अभियान अन्तर्गत बिहिबार नगरपालिका भित्रका सार्वजनिक, निजी तथा भाडाका सवारी साधनमा यात्रारत यात्रु, चालक र सहचालक साथै मास्कको प्रयोग नगरेका सर्वसाधरणलाई मास्क वितरण गरिएको छ ।
सडकमा मास्क नलगाएर हिँड्ने नागरिक, बजार पसलमा सामान किन्न आउने सर्वसाधारणलाई मास्क वितरण गरेको नगरपालिकाका उप प्रमुख भिम कुमारी राउतले जानकारी गराउनु भयो । मास्क नलगाएर हिँड्नेलाई मास्क दिने र सही तरिकाले मास्क नलगाउनेलाई मास्क लगाउन सिकाउने गरिएको उहाँले बताउनु भयो ।
