कोभिड–१९ को तेस्रो लहर सुरु भएसँगै सङ्क्रमणको दर तीव्र बढ्दैछ । त्यस्तोमा सुरक्षामा खटिएका सुरक्षाकर्मीमा पनि सङ्क्रमण बढ्दो छ ।
नेपाल प्रहरी, सशस्त्र प्रहरी र नेपाली सेनामा कार्यरत सुरक्षाकर्मीहरू मध्ये अहिले १ हजार ३८ जना आइसोलेसनमा छन् । कोभिड–१९ सङ्क्रमणको तेस्रो लहर सुरु भएसँगै सबै सुरक्षा निकायले पूर्व सावधानी अपनाउन आन्तरिक सर्कुलर गरेका छन् ।
अहिले, सशस्त्र प्रहरीमा २ सय २१ जनामा सङ्क्रमण देखिएको छ । सशस्त्र प्रहरीका डिआईजी तथा प्रवक्ता मन्दिप श्रेष्ठ पनि कोरोना सङ्क्रमणका कारण आइसोलेसनमा छन् ।
नेपाल–भारत सीमा नाकामा सशस्त्र प्रहरी खटिएको छ । सशस्त्र प्रहरी प्रधान कार्यालयले सिमानामा पूर्व सावधानीका लागी अनिवार्य मास्क लगाउन र नेपाल प्रवेश गर्नेहरूका लागी सूचना दिने गरी मास्क लगाउनेबारे फ्लेक्स बोर्ड राखेको छ । सबै जिल्लाका स्वास्थ्य कार्यालयहरूसँग समन्वय गरेर जतिसक्दो चाँडो खोपको व्यवस्थापन गर्न देशभरका कमान्डरहरूलाई सशस्त्र प्रहरी प्रधान कार्यालयले निर्देशन दिएको छ ।
त्यस्तै, तत्काल नयाँ तालिम सञ्चालन नगर्न र सरकारले तोकेको ‘कोभिड प्रोटोकल’ पालना गर्न आन्तरिक सर्कुलर गरिएको सशस्त्र प्रहरीको मुख्यालयले जनाएको छ । बलम्बुस्थित एपीएफ अस्पतालले नयाँ भेरियन्टको लक्षण र त्यसबारे बच्ने उपायबारे पनि लिखित परिपत्र गरेको छ ।
५०४ जना प्रहरीमा सङ्क्रमण पुष्टि
सुरक्षा संगठनमध्ये सबैभन्दा धेरै कोरोना सङ्क्रमण नेपाल प्रहरीमा फैलिएको छ । तेस्रो लहर सुरु भएसँगै बुधवार साँझसम्म ५ सय ४ जना प्रहरीमा कोरोना सङ्क्रमण पुष्टि भएको प्रहरीले जनाएको छ । नेपाल प्रहरी अस्पतालमा मात्र ६० जना स्वास्थ्यकर्मी र प्रहरीमा कोरोना भाइरस सङ्क्रमण पुष्टि भएको छ ।
पूर्व सावधानीका लागी प्रहरीले ड्युटीमा हुने बाहेक अरूलाई भिडमा नजान र अनिवार्य मास्क तथा स्यानिटाइजरको प्रयोग गर्न आन्तरिक सर्कुलर गरेको छ ।
अहिले जारी रहेका एडभान्स लेभलको तालिममा पनि २५ जना सम्मको सङ्ख्या र अनिवार्य स्वास्थ्य प्रोटोकल पालना गरेर सञ्चालन गरिएको केसीले बताए । सबै तालिममा प्रोटोकल पालना गरेर प्रशिक्षार्थीलाई आवासीय व्यवस्था गर्न सर्कुलर गरिएको छ ।
३१३ सैनिक आइसोलेसनमा
नेपाली सेनामा ३ सय १३ जना सैनिकलाई कोरोना भाइरस सङ्क्रमण पुष्टि भएको छ । तेस्रो लहरमा कोरोना पुष्टि हुने सैनिकको सङ्ख्या बढेपछि जंगी अड्डाले थोरै जनशक्तिबाट सैनिक गतिविधि सञ्चालन गर्न मातहतलाई सर्कुलर गरेको छ ।
नेपाली सेनाको युद्धकार्य निर्देशनालयले आइतबारबाट लागु हुने गरी उपत्यका सहित चारवटा कमाण्ड र मातहतका सबै युनिटलाई सो सर्कुलर गरेको थियो । सर्कुलर अनुसार कार्यालय सञ्चालन गर्दा न्यूनतम जनशक्ति मात्रै परिचालन गर्न भनिएको छ ।
