रबिन खड्का
खोटेहाङ गाउँ पालिका,रमाइलो

गाई मारेर गधा पोसेपछी गहुँतमा विस्वास गर्छ
कम्युनिस्ट भन्ने मान्छे छुवाछूतमा विस्वास गर्छ
किन हो ! यहाँ पढाई, भोगाइ अर्कै व्यबहार अर्कै छ
विज्ञान पढेको मेरो छोरो पनि भूतमा विस्वास गर्छ।


लाग्छ दुनियाँको धारे हातमा बाँचेको छैन
निमुखाको बिपत्तिमा कहिल्यै नाचेको छैन
खाली हात आइयो, खाली हातै जाने हो
तपाईँले जस्तो झोलाभरी टिलो साँचेको छैन ।

दु:ख साह्रै महँगो होलान् सुखहरू सस्तो होला
कि खुशी नै खुशीले भरिएको ठाउँ जस्तो होला
पुगेर आउने कोहि भेटे सोधेर ढुक्क हुने थिएँ
हैन, यो स्वर्ग भन्ने ठाउँ साच्चिकै कस्तो होला
बुझ्नेहरूका लागि पक्कै त्यो नर्कमा पनि केही छ
भन्छन् पापीहरूको लागि सुधार गृह पनि तेहिँ छ
हे ! सन्तोष परम् सुखम् धनम् जप्नेहरू हो सुन !
ऐस आराममा बाँच्नेहरूलाई स्वर्ग पनि यहीँ छ
मुहारमा चमक धमक ल्याउन खै केके जाति घस्ता हुन
ती रुपक रुपसीहरू खै के सोचेर मख्ख परि बस्ता हुन
वास्तविकता बुझेको दिन के गर्दा, के सोच्दा हुन झनै
मान्छेका यी रुप र बैँश भनेका पनि पाहुना जस्ता हुन