सत्तारुढ गठबन्धनमा सहभागी शीर्ष नेताको बैठक आज बस्ने भएको छ।
नेपाली कांग्रेस, नेकपा माओवादी केन्द्र, नेकपा एमालेको माधवकुमार नेपाल पक्ष, जनता समाजवादी पार्टी र राष्ट्रिय जनमोर्चाका शीर्ष नेताहरुको बैठक बस्न लागेको हो।
बिहान साढे ८ बजे बालुवाटरमा बस्ने बैठकमा मन्त्रिपरिषद् विस्तार, विभिन्न नियुक्तिलगायत विषयमा छलफल हुने बताइएको छ । बैठकमा मन्त्रालय भागबण्डाको विषयमा समेत छलफल हुने भएकाले आजै मन्त्रिपरिषद् विस्तार हुन सक्ने अनुमान गरिएको छ ।
गठबन्धनका शीर्ष नेता सहभागी हुने बैठकमा सरकारका अन्य काम–कारबाहीका विषयमा समेत छलफल हुने प्रधानमन्त्रीको सचिवालयले जनाएको छ । यसअघि हिजो बिहान बसेको बैठकमा जतिसक्दो छिटो मन्त्रिपरिषद्लाई पूर्णता दिने र सरकारको न्यूनतम साझा कार्यक्रम ल्याउने समझदारी बनेको थियो।
प्रधानमन्त्री भएको दुई हप्ता बित्दा पनि मन्त्रिपरिषद्लाई पूर्णता दिन नसकेको भनेर देउवाको आलोचना हुन थालेको छ । आलोचना बढ्न थालेपछि प्रधानमन्त्री देउवाले हिजो गठबन्धनका नेताहरुलाई छिटो मन्त्री बन्नेहरुको नाम दिन आग्रह गर्नु भएको थियो ।
एमालेको नेपाल खनाल पक्ष अहिलेसम्म पनि सरकारमा जाने नजाने निर्णय गर्न सकेको छैन ।जसका कारण दलहरु कसले कति मन्त्रालउ पाउने भन्ने पनि छलफल हुन सकेको छैन । जनमोर्चाले आफूहरू सरकारमा नजाने बताइसकेको छ।
